تاند:( دوشنبه، د حمل ۱۴ ) فارن پالېسي خپرونه وایي ، چې د افغانستان د پرزول شوي جمهوري نظام له خوا د قرارداد له مخې یوې لیتوانیايي کمپنۍ درې میلیونه افغاني پاسپورټونه چاپ کړي، خو د افغانستان سفارتونو ته د پاسپورټونو له سپارلو ډډه کوي او په ګودامونو کې یې ساتي.
فارن پالیسي ورځپاڼې د افغان ډیپلوماټانو په حواله راپور ورکړی، چې دغه شرکت وايي، د چاپ شویو پاسپورټونو د سپارلو لپاره یې له یوه شرکت سره تړون کړی و.
د دغه راپور له مخې، د افغانستان معتبر پاسپورټونه د سیمې د هېوادونو په تور بازار کې تر ۱۵۰۰ ډالرو پورې پلورل کېږي.
د پاسپورت نه لرل د نړۍ په بېلابېلو هېوادونو کې افغان کډوال له ستونزو سره مخ کړي دي.
دا کډوال د پناه غوښتنې یا تابعیت د غوښتلو لپاره د اداري پروسیجرونو څخه د تیریدو لپاره د پیژندنې اسنادو ته اړتیا لري لکه پاسپورت، او د ډیری مهاجرینو لپاره دا امکان نه لري چې له پاسپورت پرته سفر وکړي.
د «ګارسو پاسولیس» شرکت هم فارن پالیسۍ ته ویلي: اوس مهال د اروپايي ټولنې او د امریکا د بهرنیو چارو وزارت په همغږۍ کابل ته د سپینو پاسپورټونو د استولو چارې د تړون له مخې ترسره کیږي.
دا په داسې حال کې ده، چې په افغانستان کې د پاسپورټ ترلاسه کول خورا ستونزمن شوي او په تور بازار کې د یوه پاسپورټ بیه تر درې زرو امریکایي ډالرو رسیدلې ده.