تاند:( چار شنبه، د حمل ۹ ) د صنعت او سوداګرۍ وزارت لپاره د طالبانو د رژیم مسئولينو ويلي، چې دغه وزارت په ۱۴۰۱ مالي کال کې، د هېواد په مرکز او ولايتونو کې، څه د پاسه ۷۰۴ ميليونو ۴۸۹ زره افغانۍ عوايد راټول کړي دي.
د صنعت او تجارت وزارت طالب مرستیال مولوي قدرت الله جمال وويل: په تېر يوه کال کې دوی توانیدلي، چې د لومړي ځل لپاره د هېواد صادرات نږدې دوه ميليارده ډالرو ته ورسوي. د هغه په وینا، دغه ارقام د ۱۴۰۰ مالي کال په پرتله، ۱۳۵ سلنه زياتوالي ښيي.
مولوي جمال زياته کړه چې د تېر کال په تجارتي بيلانس کې ۹ سلنه زياتوالی راغلی، چې پر دې اساس په دغه کال کې افغانستان ۷۸ سلنه واردات او ۲۲ سلنه صادرات درلودل.
د ده په وینا طالبان د صنعت ودې ته ځانګړې پاملرنه لري او په همدې دليل اوس افغانستان تر ۵۰ پورې سکتورونو کې ( د وسپنې ويلې کولو او سيخ ګول د توليد، د مينځلو توليداتو، پنځلس قلمه دوايي، نوشابې او انرژۍ، قالينو، چاپ او داسې نورو) برخو کې ځان بسياينې ته رسېدلی دی.
د ملا جمال د معلوماتو له مخې، په ياده موده کې شاوخوا ۱۰۰ بهرنيو پانګه والو ويزې ترلاسه کړې او د هېواد په بېلابېلو برخو په ځانګړې توګه د کانونو او زراعت په برخو کې يې د پانګونې لېوالتيا ښودلې ده.
طالب چارواکي له بیا واکمنیدو تر اوسه، بیا – بیا په افغانستان کې پانګونې ته د بهرنیو پانګوالو د لېوالتیا خبره کوي، خو شنونکي وایي چې برعکس له افغانستان څخه د دوی د افراطي او استبدادي واکمنۍ له امله په سلګونه میلیارده ډالره پانګه ویستل شوې او ګڼ نور پانګوال لا هم د وتو په حال کې دي.
د طالبانو ځینې منتقدین د دولتي ادارو د عوایدو او لاسته راوړنو د زیاتیدو په اړه د طالبانو ادعاوې بې ځایه او تبلیغاتي بولي.