تاند:( دوشبنه، د کب ۲۹) په افغانستان کې د خبریالانو د ملاتړ ادارې وایي د طالبانو له واکمنېدو وروسته په دې هېواد کې 53 سلنه خبریالانو خپلې دندې بایللي دي او 50 سلنه رسنۍ د مالي ستونزو په ګدون د ډېرو سببونو له کبله بندې شوې دي.
دغو ادارو اندېښنه ښکاره کړې چې د رسنیو او خبریالانو پر ضد تاوتریخوالی په زیاتېدو دی او فعالیت یې د خرابیدو په خوا روان دی.
د افغانستان د خبریالانو مرکز وایي، په تېرو دوولسو میاشتو کې پر خبریالانو د تشدد پېښې دوه چنده زیاتې شوې دي او وایي په دې موده کې “د رسنیو او خبریالانو له ازادۍ د سرغړونې لږ تر لږه 237 پېښې ثبت شوې دي، چې ګواښونه، نیول او له تشدده ډک چلند پکې شامل دي”.
سرچینه زیاتوي:”د 50 سلنه رسنیو په تړل کېدو 53 سلنه خبریالانو او د رسنیو کارکوونکو خپلې دندې بایللې دي، د رسنیو او خبریالانو د ملاتړ قوانینو راتلونکی په یو مبهم حالت کې پاتې دی او د بد اقتصادي حالت له کبله یو شمېر خبریالانو درنو کارونو ته مخ کړی”.
د ازادو رسنیو د ملاتړ اداره «نی» هم وایي، د طالبانو د حکومت له خوا په رسنیو باندې د محدودیتونو او اقتصادي ستونزو کبله ډېرې رسنۍ بندې شوې او د ښځینه خبریالانو په ګډون زرګونو خبریالان بې روزګاره شوي دي: د 2023م کال له پیله تر اوسه پورې موږ د خبریالانو پر وړاندې د بدمرغه پېښو شاهدان یو، تر درو میاشتو په کمه موده کې د «نی» په دفتر کې د خبریالانو په ضد د تاوتریخوالي نیژدې 30 پېښې ثبت شوې دي”.
تېره اوونۍ د بلخ په مرکزي ښار مزارشریف کې په تبیان کلتوري مرکز کې چادونه شوې وه چې پکې د دوو خبریالانو په ګډون درې تنه وژل شوي وو او 18 تنه نور ټپیان شوي وو. په ټپیانو کې هم اکثره خبریالان وو او چاودنه خبریالانو ته د ستاینلیکونو د ورکولو په غونډه کې شوې وه.
د طالبانو د رژیم ویاند ذبیح الله مجاهد بیا دا راپورونه له واقعیته لیرې بولي او وایي، چې دوی د بیان ازادۍ ته درناوی لري او خبریالانو سره تر پخوا ښه چال چلند کیږي.
دا په داسې حال کې ده، چې د افغانستان سلګونه خبریالان د طالبانو له بیا واکمنیدو سره هېواد پریښودو ته اړ شوي او په کور دننه هم بد اقتصادي وضعیت او نورو ستونزو نه شکایت لري.