تاند:( یکشنبه، د کب ۲۸) د ازبکستان د بهرنیو چارو وزارت مرستیال فرغت صادقوف د منځنۍ اسیا لپاره د ملګرو ملتونو د کډوالو د عالي کمېشنرۍ له سیمه ییز مشر هانس شودر سره د لیدنې پر مهال افغانانو ته د بشري مرستو د رسولو د بهیر د دوام په اړه خبرې وکړې.
دغه هېواد ویلي، چې په دې کتنه کې د ازبکستان او د کډوالو په چارو کې د ملګرو ملتونو د عالي کمېشنرۍ ترمنځ همکاري وڅېړل شوه.
د ملګرو ملتونو استازو بیا ویلي، چې د ازبکستان د ترمز له لارې افغانستان ته د بشري مرستو د لېږد د لړۍ چټکول د دغې لیدنې د بحثونو اصلي موضوع وه.
مخکې اروپایي ټولنې هم د ازبکستان له لارې افغانستان ته د بشري مرستو د لېږد په اړه خبرې او عملي اقدامات کړي وو.
د خوړو نړیوال سازمان څه موده مخکې وویل، چې د ورځې تر لس زره ټنه پورې خوراکي توکي د ازبکستان له لارې افغانستان ته لیږدوي.