تاند:( یکشنبه، د کب ۲۸)  ‏د کندهار د میرویس نېکه روغتون نرسانو د کار بندیز کړی و، خو طالب چارواکي یې د پای ته رسیدو خبر ورکوي.

يو شمېر نرسانو رسنیو ته ويلي، چې طالبانو په کاري ارزونه کې د ناکامیدو په پلمه، له دندو ګوښه او پر ځای ېې نور کسان ګومارلي دي.

سرچينو ويلي، چې په دغه کار بندیز کې د روغتون ټولو شاوخوا پنځوس نرسانو ګډون کړی، خو طالبانو ګواښلي چې کار بندیز پای ته ورسوي.

د نرسانو په وینا، طالبانو ېې پر ځای د خپلې ډلې تازه فارغ شوي نرسان ګومارلي، چې دا د دوی او مراجعینو ټولو په حق کې ظلم دی.

د طالبانو ځایي چارواکو بیا د نرسانو د ستونزو د حل په اړه د پلاوي د ټاکلو او د دوی د کار بندیز د پای ته رسیدو خبر ورکړی.