تاند:( دوشنبه، د کب ۲۲) د روغتیا نړیوال سازمان د افغانستان څانګې ویلي، چې د اروپايي ټولنې د روغتیایي مرستو یوه کڅوړه کابل ته رسېدلې ده.
سرچینې په خپله ټویټر پاڼه کې لیکلي، چې د مرستو دغه بسته چې د حفظ الصحې توکي او د لومړنیو مرستو کڅوړې په کې شاملې دي، په افغانستان کې د ملګرو ملتونو د دفتر (یوناما) او په افغانستان کې د اروپايي ټولنې د پلاوي له لارې به په ټول هېواد کې وویشل شي.
د روغتیا نړیوال سازمان ویلي چې د مرستو دغه بسته به د ګڼ شمېر افغانانو د روغتیا په ښه کولو کې رول ولوبوي.
د اروپايي ټولنې د بهرنۍ تګلارې مشر “جوزف بوریل” تر دې مخکې خبریالانو ته ویلي و، چې د اروپايي ټولنې د غړو هېوادونو د بهرنیو چارو وزیرانو هوکړه کړې، چې له افغانستان سره به بشري او ابرومندانه مرستې دوام لري او له توپیر پرته به پر اړمنو کسانو وېشل کېږي.
اروپایي ټولنې د طالبانو د حاکم رژیم په نه په رسمیت پېژندو له ټینګار سره ویلي، چې افغانستان سره به بشري مرستو ته دوام ورکوي.