تاند (سې شنبه، د تلې/ میزان ۷ مه) ایا له مرګ وروسته د انسان بدن حرکت کولی شي؟ په ټولنیزو رسنیو کې یوې خپرې شوې ویډیو یو ځل بیا دې پوښتنه د خلکو پام اړولی دی.
په طبي علومو کې دغسې حرکاتو ته «له مرګ وروسته انعکاسي حرکات» یا Postmortem Reflexes ویل کېږي.
طبي متخصصان وايي، د دماغ او زړه د فعالیت له درېدلو وروسته هم ځینې وخت د انسان په بدن کې د عضلو غیرارادي حرکات رامنځته کېدای شي. پاتې عصبي فعالیت، د ملا تیر انعکاسي غبرګونونه، په بدن کې کیمیاوي بدلونونه او له بهر څخه فزیکي فشارونه د ګوتو، لاسونو او پښو د رپېدو یا حرکت سبب کېدای شي.
د دې یوه نادره بېلګه د «لازاروس نښه» ده. دا د ملا تیر له عصبي انعکاس سره تړاو لري او په ځینو هغو ناروغانو کې چې دماغي مړینې حالت یې تایید شوی وي، د لاسونو د حرکت سبب کېدای شي.
متخصصان ټینګار کوي چې له مرګ وروسته د بدن دا ډول حرکات په دې معنا نه دي چې انسان ژوندی یا هوښیار دی؛ بلکې دا له مړینې وروسته د طبیعي بدلونونو پر مهال د بدن رامنځته کېدونکي غیرارادي غبرګونونه دي.
د وخت په تېرېدو سره، کله چې په بدن کې نور بدلونونه، لکه د مړي د بدن کلکېدل (Rigor Mortis) رامنځته شي، دغه حرکات هم په پای کې له منځه ځي.