تاند:( یکشنبه، د کب ۲۱) د پاکستان د پولي واحد( کلدارو) له ورځ تربلې سقوط سره یو شمېر پاکستانیان د دغه کار پړه پر افغانستان اچوي او ادعا کوي، چې له پاکستان څخه افغانستان ته ډالر قاچاق کیږي او دا د کلدارو د سقوط سبب شوی.
د پاکستان مالیې پخوانی وزیر مفتاح اسماعیل بیا وایي، چې پاکستانیان پر نورو د پړې اچولو له عادته باید تېر شي او ومني، چې ملامتي په دوی کې ده.
دا په داسې حال کې ده، چې یو شمېر افغانان بیا د کلدارو د نسبي دوام یو دلیل هم له افغانستان څخه دغه هېواد ته د امریکایي ډالرو او نورو مهمو بهرنیو پیسو قاچاق بولي.
طالب چارواکي بیا پاکستان او ایران ته د بهرنیو پیسو قاچاق ردوي او وایي، چې د مخنیوي لپاره یې جدي هڅې کوي.