تاند: ( دوشنبه، د حوت ۸ ) د طالبانو د رژیم ویاند ذبیح الله مجاهد په کابل ښار کې د داعش ډلې پر ضد د یکشنبې ورځې د ماښام د عملیاتو جزیات خپاره کړي.
نوموړي ویلي، چې دغه عملیات د طالبانو د استخباراتو د ځواکونو له لوري د کابل خيرخانې اړوند شهرک ذاکرين سیمه کې ترسره شوي.
سرچینه زیاتوي، چې په دغه سیمه کې د داعشیانو يو مهم پټن ځای و، چې د دوی د عملیاتو په پایله کې دوه داعشيان پکې وژل شوي او یو تن ژوندی نیول شوی.
د طالبانو ویاند زیاتوي:(( دوه میله کلاشینکوف ، يو واسکټ او په زياته اندازه مهمات ترې ونيول شول.د داعشیانو دې ګروپ د تخریبي کړنو پلان درلود چې د لوی الله په نصرت مخکې له مخکې کشف او له منځه یوړل شول.))
د مجاهد د معلوماتو له مخې، د عملیاتو پر مهال د دوی ځواکونو ته زیان نه دی اوښتی.
داعش ډله معمولاً د داسې عملیاتو او خپلو فعالیتونو په اړه په وروستیو کې رسنیز غبرګون نه څرګندوي.