تاند: ( یکشنبه، د حوت ۷ ) په ایران کې د افغانستان سفارت نن رسماً د طالبانو د رژیم ټاکل شویو دیپلوماتانو ته وسپارل شو.
په ټولنیزو رسنیو کې خپاره شوي عکسونه څرګندوي، چې د طالبانو دیپلوماتان د سفارت په دفترونو کې د خپلې ډلې سپین بیرغ سره ناست دي.
یو شمېر خلکو طالب دیپلوماتانو ته د افغان سفارت سپارل نقد کړي او له یوه استبدادي او نا مشروع رژیم څخه یې ملاتړ ګڼلی، خو ځینو نورو بیا دا کار ستایلی او ویلي، چې د طالبانو رژیم سره د دغه سفارت له اړوندیدو سره به د مراجعینو ستونزو ته ښه رسیده ګي وشي.
ایراني چارواکو ویلي، چې د پرزول شوي جمهوري نظام د پاتې شونو دیپلوماتانو دندې پای ته رسیدلې وې، ځکه یې سفارت د طالبانو له لوري معرفي شویو دیپلوماتانو ته وسپاره.
ایران ټینګار کړی، چې د طالب دیپلوماتانو له منلو سره به، د طالبانو له رژیم څخه د ایران د شناخت حقوقي بڼه بدله نه شي.
د طالبانو پلویانو د ایران دغه ګام ستایلی او له نورو هېوادونو یې هم دوی ته د افغان سفارتونو د سپارلو غوښتنه کړې ده.
د طالبانو د رژیم له بیا واکمنیدو شاوخوا اتلس میاشتې کیږي، خو تراوسه د نړۍ هیڅ کوم هېواد دوی په رسمیت نه دي پېژندلي.