تاند: ( یکشنبه، د دلوې ۳۰ مه ) د طالبانو د رياست الوزرا اداري مرستيال محترم مولوي عبدالسلام حنفي په مشرۍ د حج او عمرې ملي کمېټې غونډه وکړه.
د ملا حنفي د دفتر په یوه اعلامیه کې راغلي:(( په دې غونډه کې د غونډو ترسره کولو څرنګوالي، د تخنيکي او روغتيايي کمېټو جوړولو او د پاسپورټونو او تذکرو وېشلو په برخو کې د اسانتياوو رامنځته کولو، واکسين، په واحد ځای کې د بانکي چارو ترسره کولو او د ۱۴۴۴ هـ ق کال د حاجيانو لېږد په اړه هر اړخيز بحث او په دې تړاو لازم تصميمونه ونيول شول.))
طالبانو په دې اعلامیه کې د یادو بحثونو او پریکړو جزیات نه دي په ډاګه کړي.
د طالبانو له لوري د حاجیانو لپاره د تېر کال تدابیر د خلکو له لوري ستایل شوي دي.
طالبانو تېرکال د افغان حاجیانو له لګښتونو څخه اضافه شوې پیسې بیرته دوی ته ستنې کړې وې.