تاند (یکشنبه، د دلوې ۳۰مه) د افغانستان له متحده عربي اماراتو څخه درېیمه یا وروستۍ شل اوره سیالي وګټله او په دې توګه د درو شل اوره لوبډلۍ ګټونکی شو.
پچه افغانستان وګټله او غوره یې وبلله چې لومړی باولینګ وکړي.
متحده عربي اماراتو د تېرو دوو سیالیو خلاف ښه بیټنګ وکړ. د ۶ لوبغاړو د سوځېدو په بدل کې یې ۱۶۳ منډې وکړې خو افغان لوبغاړو د کریم جمنت او ابراهیم ځدراڼ په مټ دا هدف په داسې حال کې پوره کړ چې ۴ لوبغاړي یې سوځېدلي وو او ۵ توپونه یې لا لرل.
د دې لړۍ، چې د متحده عربي اماراتو په کوربه توب په ابوظهبي کې وشوه، لومړۍ مسابقه افغانستان او دوهمه متحده عربي اماراتو وګټله.
د افغانستان لپاره تر ټولو ښه لوبه کریم جنت وکړه. کریم جنت، چې ال راونډر دی، په ۲۲ توپونو ۵۶ ناسوځېدلې منډې وکړې. دی د دې سیالۍ غوره لوبغاړی او همداراز تر ټولو اغېزمن لوبغاړی وپېژندل شو.
له ۲۰۱۶ م کال راهیسې د دوو هیوادونو لوبډلو په خپل منځ کې ټولټال ۵ مسابقې کړي چې تراوسه یوه متحده عربي اماراتو او ۴ نور افغانستان ګټلي دي.