تاند: ( شنبه، د دلوې ۲۹مه ) د کندهار په سپين بولدک ولسوالۍ کي د اوبو چیک ډم ګټې اخیستني ته وسپارل شو.
د کندهار لپاره د طالبانو د اقتصاد رئیس ملا عبدالسلام بريالي وويل، چي ياد چيک ډم د اقتصاد او کرنې ریاست تر رهبرۍ لاندې “یو این ډي پي” موسسې د ۵۳ زره امریکايي ډالرو په لګښت جوړ کړ.
د هغه په وینا، دغه چیک ډم ۶۰ متره اوږدوالی او ۱۳ متره لوړوالی لري.
سرچینه زیاتوي: په دې چيک ډم کې ۱۷۰ زره متره مکعب اوبه زېرمه کیږي.
د طالب مقام په وینا، د چیک ډم زېرمه شوې اوبه د بیدک کلي ټولو کورنیو ته ورکول کیږي.
ملا بريالي زياته کړه، چي د چيک ډم ګټه زرګونه کورنيو ته رسیږي.
په وروستیو کې له کندهار څخه د ورته رغنیزو پروژو خبرونه زیات شوي.
دغه ولایت د تېرې شاوخوا شل کلنې جګړې پر مهال له ډېرو رغنیزو پروژو او لومړنیو خدماتو څخه بې برخې و.