تاند: ( جمعه، د دلوې ۲۸مه ) د کندهار د عامې روغتیا ریاست مسوولین وايي، چې د دغه ولایت د ميرويس حوزوي روغتون ١٠٠٠ بستریز روغتون ته لوړ او دوې بېړنې څانګې پکې فعالې شوې.
د عامې روغتیا وزارت د پلان او پالیسۍ لپاره د طالبانو د ادارې معین محمد حسن غیاثي وویل، چي دوی د میرویس حوزوي روغتون له ۳۵۰ بستریز څخه ۱۰۰۰ بستریز ته لوړ کړ.
د دغه وزارت مالي او اداري معین مولوي محمد اسحاق صاحبزاده د یاد روغتون خدمتونه وستایل او له ډاکټرانو یې وغوښتل، چې شپه او ورځ د ولس لپاره کار وکړي، تر څو ناروغان نورو هېوادونو ته د درملنې لپاره مجبور نه شي.
طالب چارواکو ویلي، چې په میرویس حوزوي روغتون کې د کوچنیانو او لویانو د داخلې او جراحۍ برخو کې دوې بېړنۍ څانګې هم پرانیستل شوې.
دوی د روغتون د زر بستریزه کیدو او نورو وړتیاوو د زیاتیدو جزیات نه دي په ډاګه کړي.