تاند: (پنجشنبه، د دلوې ۲۷) د ایران د بهرنیو چارو وزیر حسین امیرعبدالله په ایران کې د القاعدې د مشر د شتون په هکله خپاره شوي راپورونه خندونکي وبلل.
نوموړي د دغو خبرونو په غبرګون کې پر خپلې ټویټر پاڼې ولیکل: د القاعدې د مشر په اړه د خبرونو جوړول او له ایران سره د هغه ملګرتیا مسخره ده.
هغه زیاته کړه: زه د سپینې ماڼۍ چارواکو ته مشوره ورکوم چې د ایران د ځورونې د ناکامې لوبې مخه ونیسي.
ايراني وزير وویل: «امریکا د القاعدې او داعش د پیلولو تر څنګ، په نړۍ کې د تروریزم د ودې مسووله ده.” ادرس مه غلطوئ.»
ملګرو ملتونو په یوه تازه راپور کې ویلي، چې په ډېر ګومان ایران مېشتی مصری سیف العدل د القاعدې ډلې د وژل شوي مشر ایمن الظواهري ځای ناستی ټاکل شوی.
د امریکا بهرنیو چارو وزارت هم د ملګرو ملتونو دغه راپور تایید کړی دی.
ځينې شنونکي باور لري، چې د ملګرو ملتونو د دغه راپور په جوړولو کې امریکایي استخبارات ډېره ونډه لري او ممکن پر ایران د امریکا د پوځي او نورو فشارونو زیاتیدو ته زمینه برابره کړي.