تاند: ( پنجشنبه، د دلوې ۲۷مه) د کندهار چارواکو په دې ولایت کې د مهمند نړیوال روغتون د مشر حاجي محمد صدیق مهمند له خولې خبر ورکړی، چې دوی په کندهار کې د زړه د ناروغانو لپاره عملیاتونه پيلوي.
د کندهار لپاره د طالبانو د والي دفتر په یوه اعلامیه کې ویلي، چې ښاغلي مهمند دا خبره د طالبانو والي حاجي یوسف وفا سره د لیدنې پر مهال کړې ده.
سرچینې زیاته کړې، چې یاد شوي روغتون د دغو عملیاتو د پيل لپاره دوه متخصص ډاکټران، چې په بهرنیو هېوادونو کې یې اړوندې زده کړې کړي، کندهار ته راوستي او نن پنجشنبه به د عملیاتو دغه لړۍ پيل شي.
د طالبانو په اعلامیه کې راغلي:« په یادو عملیاتونو کې د لویانو د زړه د والونو تبدیلولو او د زړه د رګونو تبدیلولو عملیاتونه او د دې ترڅنګ د کوچنیانو د زړه د سوریو عملیاتونه شامل دي.»
د کندهار لپاره د طالبانو والي حاجي محمدیوسف وفا د مهمند نړیوال روغتون دغه ګام او په هېواد کې پانګونه ستایلې ده.
د یادونې وړ ده، چې مهمند نړیوال روغتون د هېواد په کچه له تر ټولو مجهزو روغتونونو څخه ګڼل کیږي.
د جمهوري نظام په وروستیو وختونو کې ولسمشر غني کندهار ته د خپل وروستي سفر پر مهال یاد شوی خصوصي روغتون رسماً پرانیست او لیدنه یې ورڅخه وکړه.