تاند (دوشنبه، د دلوې ۲۴ مه) له ازبکستان سره د ریلګاډي په وسیله د سوداګري مالونو د وړلو راوړلو په برخه کې د ستونزې له حل کېدو وروسته په تیرو دوو ورځو کې له دې لارې تر بل هر وخت د سوداګرو ډیر مال انتقال شوی دی.
د افغانستان د ریلګاډې د ادارې چارواکو پرون وویل چې په وروستیو دوو ورځو کې د سوداګرو په مالونو بار ۷۱۴ ډبې یا واګونه له ازبکستان څخه حیرتان بندر ته رارسیدلي دي.
د دې ادارې ویندوی عبدالسمیع دراني وویل، د جمعې او شنبې په ورځو په ۷۱۴ واګونونو کې ۴۲ زره ۳۳۶ ټنه مال له ازبکستان څخه حیرتان بندر ته رارسیدلی دی.
د ښاغلي دراني په وینا اکثره وارد شوی مال خوراکي مواد دي.
د حیرتان بندر له لارې په ریلګاډي کې ازبکستان ته او له ازبکستانه افغانستان ته د سوداګري مالونو د وړلو – راوړلو بهیر د روانې دلوې په ۱۲ مه د ازبکستان له لوري ودرول شو. خو ازبکستان ته د طالبانو د حکومت د یوه پلاوي له سفر او له یوه نوي فرارداد وروسته د جمعې په ورځ (د فبرورۍ ۱۰ مه) د ریلګاډي تګ راتګ بیرته پیل شو.
په ۹ ورځو کې، چې د حیرتان بندر بند و، په افغانستان کې یو شمېر جنسونه په تېره بیا تېل ګرانه شول او اندېښنه وه چې نور هم ګرانه شي.