تاند:( پنجشنبه، د دلوې شلمه) د ملګرو ملتونو امنیت شورا نن په افغانستان کې د داعش ترهګرو د ګواښ اړوند ناسته کوي.
د یادې غونډې په اړه ډېر جزییات نه دي ورکړل شوي.
د سېمې یو شمېر هېوادونه او نړيوال په افغانستان کې د داعش ډلې فعالیتونه د اندیښنې وړ بولي، خو په افغانستان کې د طالبانو حاکمه اداره ياده ډله ځپل شوې بولي او وايي جدي ګواښ نه دی.
د طالبانو چارواکي وخت په وخت په پلازمېنه کابل او يو شمېر ولايتونو کې د داعش ډلې د ځپلو خبر ورکوي.
په افغانستان کې د ایران د سفارت مشر حسن کاظمي قمي په یوه وروستی مرکه کې یو ځل بیا امریکا متحده ایالات په افغانستان کې د داعش ډلې له فعاليتونو څخه په ملاتړ تورن کړل.
امریکايي چارواکو په دې اړه تورونه رد کړي.
د طالبانو حاکمې ادارې د ملګرو ملتونو د تازه غونډې په اړه غبرګون نه دی ښودلی.