تاند:( سې شنبه، د دلوې يوولسمه) د پاکستان پخواني صدراعظم عمران خان د دغه هېواد پخوانی ولسمشر آصف علي زرداري د ده د وژلو لپاره ترهګرو ته په پيسو ورکولو تورن کړی.
نوموړي په یوه تازه وینا کې دا ادعا کړې، خو نور جزییات یې په دې اړه نه دي ورکړي.
د پاکستان د بهرنيو چارو وزير بلاول بوټو زرداري، چې پخوانی ولسمشر زرداري ېې پلار دی، د عمران خان تورونه بې بنسټه ګڼلي دي.
نوموړي عمران خان تورن کړی، چې په واکمنۍ کې ېې ترهګرو ډلو سره نیږدې اړیکې لرلې او دغو ډلو سره په مذاکراتو ېې د هغوی مورال پیاوړی کړی.
د پاکستان صدراعظم شهباز شريف هم د عمران خان څرګندونې رد کړي دي.
په وروستيو کې د پاکستان د سياستوالو تر منځ ورته ناندرۍ زیاتې شوې دي.