تاند:( يکشنبه، د دلوې نهمه) د هرات لپاره د طالبانو ځايي مسوولین وایي، چې په دغه ولایت کې د سلما بند د اوبو کچې د معلومولو پروژه پرانیستل شوه.
د دوی په وینا ، د ویناج کانال د ساتنې پروژه د اوبو او انرژۍ وزارت یوه له مهمو پروژو څخه ده، چې د هرات د چشت شریف ولسوالۍ په سلما بند کې موقعیت لري.
د دې پروژې تړون د اوبو او انرژۍ وزارت له بودجې څخه د یونیک وهاج ساختماني شرکت سره د ۷ میلیونو، ۲۴۷ زره او ۷۴۸ افغانیو په ارزښت د هرات د کوز هريرود سیندیزې فرعي حوزې د رئیس مولوي سردار ولي مزمل او د چشت شریف ولسوالۍ مرستیال په شتون کې لاسلیک شوی او نن یې چارې پیل شوې.
د دغې پروژې د جوړولو او ساتنې موخه د سلما بند د اوبو کچې معلومول او د سلما بند اړوند تخنیکي مسایل ښودل شوي دي.
طالبانو د يادې پروژې په اړه تخنيکي معلومات نه دي خپاره کړي.
د سلما بند پروژه د جمهوري نظام پر مهال د ایران له ډېرو مزاحمتونو سره بشپړه شوه.
هغه مهال د افغانستان اوسنۍ حاکمه ډله د ايران په لمسه د سلما بند پروژې د کارکونکو په وژلو تورنيدل.