تاند ( شنبه د زمري ـ اسد ۱۷مه) افغانستان کې د طالبانو د حکومت د ریاستالوزراء اقتصادي معاونیت ویلي چې، د هغو ټولو سیمهییزو پروژو د پلي کېدو لپاره زمینه برابره شوې چې د افغانستان او سیمې د اقتصادي ودې لامل ګرځي.
یاد معاونیت ویلي، د افغانستان خاوره کې د ټاپي نللیکې د ۱۱۶ کیلومتره برخې د جوړولو چارې بشپړې شوې او د ۱۳۵ کیلومتره مسیر د نللیکې نصبولو لپاره چمتووالی نیول شوی دی.
د طالبانو د اقتصادي معاونیت د معلوماتو له مخې، ټاکل شوې چې د روان کال تر پایه د ټاپي ګاز نللیکې چارې تر هرات ښار پورې بشپړې شي او په نږدې راتلونکې کې به په دغه ښار کې د ګازو د وېش سروې او ډیزاین چارې پیل شي.
اقتصادي معاونیت زیاته کړې، چې د ټاپي پروژې له لارې د ګازو د لېږد له پیل سره به په هرات کې صنعتي فعالیتونه پراخ او سلګونو فابریکو ته به د فعالیت زمینه برابره شي.
د یادونې وړ ده، چې د ټاپي پروژه د افغانستان له لارې د ترکمنستان طبیعي ګاز پاکستان او هند ته لېږدوي.
طالبان وایي، د دې پروژې چارې اوس مهال د افغانستان په خاوره کې په چټکۍ سره روانې دي او ټاکل شوې چې ډېر ژر یې د هرات ښار پورې د جوړولو چارې بشپړې شي.