تاند (سې شنبه، د دلوې ۴ مه) د افغانستان او نړۍ د کریکټ نامتو لوبغاړي راشد خان د جنوبي افریقا په غوره لیګ کې د شل اورونو په فارمټ کې ۵۰۰ ویکټونه پوره کړل.
دی تر دې دمه د نړۍ دوهم لوبغاړی دی چې په شل اوره سیالیو کې یې ۵۰۰ ویکټونه اخیستي دي.
راشدخان، چې د جنوبي افریقا په روانه غوره لیګ کې د کیپ ټاون لوبډلې کیپتان دی، د د دوشنبې په ورځ له پریتوریا کيیټلز لوبډلې سره په مسابقه کې درې لوبغاړي په داسې حال کې وسوځول چې یوازې یې ۱۶ منډې ورکړې.
د جنوبي افریقا باولر داواین بریفو ۶۱۴ ویکټونه اخیستي خو نوموړي تر راشدخان خورا ډیرې لوبې کړي دي.
راشدخان د تیر میلادي کال په وروستیو کې وروسته له دې د افغانستان د کریکټ د ملي لوبډلې د شل اوره سیالیو کیپتان غوره شو چې تکړه لوبغاړي محمدنبي له کیپتانۍ استعفا ورکړه.
راشد خان په وروستیو کې د استرالیا له لوري له افغانستان سره د یو ورځنیو سیالیو د لوبلړۍ پر لغوه کولو نهیلي ښوولې او خبرداری یې ورکړی چې ښايي په دې خاطر د استرالیا په بیګ باش غوره لیګ کې ګډون ونه کړي.