تاند:( دوشنبه، د دلوې درېیمه) د پښتون ژغورنې غورځنګ د کراچۍ څانګې په پاکستان کې د مېشتو افغان کډوالو او د خپل غورځنګ د رهبرۍ غړي علي وزير په ننګه لاريون وکړ.
د دغه لاريون پر مهال د افغان کډوالو پر وړاندې د پاکستاني ځواکونو ناوړه چلند غندل شوی او هم د پاکستان له زندانه د ملتپال سياستوال علي وزير د خوشې کیدو غوښتنه شوې ده.
ښاغلی وزیر، چې د پاکستان په پارلمان کې د وزيرستان د خلکو منتخب استازی هم دی، له څو کلونو راهيسې پاکستان د پښتنو پر ضد د خپلو سياستونو د توند مخالفت له امله بندي کړی.
د پاکستان څو محکمو د ښاغلي وزير د خوشې کیدو پریکړه کړې، خو د پاکستان پوځ د نوموړي د خوشې کیدو مخالفت کړی دی.