تاند:( چارشنبه، د جدي ۲۸) د اروپايي ټولنې د امنيتي ادارو په يوه تازه راپور کې اروپا ته د افغانانو د ناقانونه تګ د سطحې د زیاتیدو خبر ورکړل شوی.
د اروپا د سرحد او سمندري ګارد په یوه راپور کې راغلي، چې په ۲۰۲۲ کال کې د افغانانو د ناقانونه ورتګ پېښې ۳۳۰ زره تنو ته رسېدلی و، چې د ور تېر کال په پرتله ۶۴ سلنه زیاتوالی ښيي.
ويل شوي، چې ډېری افغانان د ختيزې اروپا له لارې دغه سفرونه ترسره کوي.
په يادو کسانو کې د ۱۰ سلنه ښځو او ۹ سلنه ماشومانو د موجودیت خبر هم ورکړل شوی.
په افغانستان کې د فقر او اقتصادي ناورين شدت، د طالبانو له لوري د واک انحصار، له نړيوالو سره د افغانستان د تعاملاتو ختميدل، د نجونو او ښځو پر زده کړو او کار بنديزونه او په ټوله کې له اساسي حقونو د خلکو محروميدل او له افغانستان څخه نهيلي کيدل د ورځ تر بلې کډوالۍ د زياتيدو اصلي لاملونه ګڼل کېږي.
دا په داسې حال کې ده، چې وخت په وخت د ناقانونه سفرونو له امله د افغان پناه غوښتونکو د وژل کیدو او تلفاتو خبرونه هم ورکړل شوي.