تاند:( سې شنبه، د جدي ۲۷) په ننګرهار کې د ۴۲ ميليونه افغانيو په لګښت د اوبو شپږ شبکو د رغونې چارې پیل شوې.
د ننګرهار لپاره د طالبانو ځايي چارواکو ویلي، چې د يونيسف ادارې په ۴۲ ميليونه افغانيو مالي لګښت او د کوار ادارې په تخنيکي همکارۍ د اوبو شپږ شبکو د رغونې چارې پيل شوې، چې د دريو مياشتو په موده کې به ګټې اخيستنې ته وسپارل شي او څلور زره کورنۍ به د پاکو اوبو له نعمت څخه برخمنې شي.
چارواکو ويلي، چې د اوبو دا شبکې کالونه وړاندې د کانال رياست په ملکيت کې جوړې شوې وې، چې اوسمهال تخريب او غير فعاله وې.
په يوه بل خبر کې راغلي، چې يونيسف د ارزګان په مرکز ترينکوټ کې د سولري بريښنا يوه سل کیلو واټه پروژه په ۷ ميليونه افغانيو بشپړه او ګټې اخيستنې ته سپارلې ده.