تاند:( یکشنبه، د جدي ۲۵) د طالبانو د سوداګرۍ او صنعت وزارت چارواکي وايي، چې په تېرو ۱۵ مياشتو کې ۱۵۰ بهرنيانو په افغانستان کې د پانګونې جوازونه اخيستي دي.
د دغه وزارت ویاند عبدالسلام آخندازده ويلي، چې ياد شوي پانګوال د امریکا، چین، بریتانیا ، کاناډا، پولنډ، هالنډ، پاکستان، ایران، تاجیکستان، ازبکستان او ځينو خليجي هېوادونو اړوند دي.
د اخند زاده په وينا، يو شمېر دغو پانګوالو خپل عملي فعاليتونه پيل کړي هم دي.
د طالبانو له واکمنيدو سره د دوی چارواکو بيا – بيا مختلفو هېوادونو ته د سفرونو او پانګوالو سره د نورو اړيکو له لارې دوی په افغانستان کې د امنيت راتلو له ژمنې سره پانګونې ته وهڅول.
شنونکي باور لري، چې طالبانو د خپلو افراطي کړنو له امله نه يوازې، چې په افغانستان کې بهرنۍ پانګونې چندان جذب نه کړای شوې؛ بلکې له افغانستان څخه د پراخو پانګونو د ويستو سبب هم وګرځيدل.