تاند:( شنبه، د جدي ۲۴) د طالبانو د ادارې د عامې روغتیا وزارت هغه اندېښنې ردوي، چې ګواکې هېواد کې د کرونا ناروغۍ پېښې زیاتې شوې دي.
د یاد وزارت مسولین وایي، چې د کرونا کچه ټېټه ده او توانیدلي د یادې ناروغۍ د مخنیوي لپاره ۱۲ میلیونه ډوزه واکسین تطبیق کړي.
له دې سره، د افغان – جاپان روغتون ډاکټران وايی، چې په ورځني ډول له دوی سره د کرونا دوې پيښې ثبتېږي او کوم ناروغان چې وروړل کېږي په ښه توګه یې درملنه کېږي.
دا په داسې حال کې ده، چې د سړې هوا له زياتيدو سره د کرونا ویروس د پېښو د زیاتېدو په اړه اندیښنې زیاتې شوي دي.
طالب چارواکي د دغه ويروس ناروغانو ته د درملنې د چمتووالي خبر په داسې مهال ورکړی، چې افغانستان د فقر او بشري ناورين تر څنګ د روغتيايي خدمتونو له سخت کمښت سره هم مخامخ دی.