تاند:( شنبه، د جدي ۲۴) د افغانستان بانک لپاره د طالبانو چارواکي کابل ته له څه مودغ ځنډ وروسته د نقدي بشري مرستو د بيرته پيليدو خبر ورکوي.
د دغه بانک په یوه اعلامیه کې راغلي:« افغانستان ته د ۴۰ میلیون ډالرو نغدي بشري مرستې کڅوړه را ورسېده او په کابل کې یو سوداګریز بانک ته و سپارل شوه.»
افغانستان بانک زياتوي، د هر هغه اصولي اقدام چې هېواد ته د اسعارو د راتګ او د ټولنې له اړمنو کسانو سره د مرستې لامل کېږي،ستاینه کوي.
طالب چارواکو د نړیوالې ټولنې د بشري مرستو د هر کلي تر څنګ، هیله ښودلې چې دا مرستې د بانکي سکتور له لارې تر سره شي.
د بشري مرستو دغه لړۍ څه موده مخکې پوهنتونونو ته د نجونو او نادولتي موسسو ته د ښځينه کارکوونکو د ورتلو د مخنيوي له پريکړې سره ځنډول شوې وه.
طالب چارواکو په دې اړه له خپلې پريکړې دفاع کړې او ویلي، چې د « اسلامي شريعت» د تطبيق لپاره د نړيوالو مرستو د ځنډیدو په ګډون فشارونو ته غاړه نه ږدي.
د طالبانو منتقدین بيا دوی د يوه وږي ملت په يرغمل نيولو او په بدل کې ېې د خپلې ادارې د تمويل لپاره له نړيوالو د امکاناتو په اخيستو تورنوي.