تاند:( چار شنبه، د جدي ۲۱) په کابل کې د بهرنيو چارو وزارت مخې ته نن چاودنه شوې، چې د تلفاتو په اړه بېلابېل راپورونه ورکړل شوي.
د کابل د امنیې قومندانۍ لپاره د طالبانو ویاند خالد ځدراڼ يوازې پېښه تایید کړې او ویلي، چې نور جزییات به وروسته رسنيز شي.
د پېښې له ځايه په خپرو شويو عکسونو کې لیدل کیږي، چې یو شمېر مړي او ټپيان پر سړک پراته دي.
ايمرجنسي روغتون د پېښې له ځايه د ۳ مړو او دوو ټپیانو د ور وړل کیدو ویلي، خو نورو سرچينو د مرګ ژوبلې کچه لوړه ښودلې ده.
تر اوسه د پېښې دقیق هدف نه دی معلوم او چا یې مسوولیت پر غاړه نه دی اخیستی.