تاند:( سې شنبه، د جدي ۲۰) د «ثوث چاینا مورنینگ پوسټ» په نوم چينايي رسنۍ په يوه مطلب کې انديښنه ښودلې، چې په افغانستان کې به پر چینایي وګړو په ۲۰۲۳ کې هم د داعش ډلې بریدونه دوام وکړي.
دغې رسنۍ دې ته په اشارې، چې چین په کابل کې د خپلو اتباعو پر مېلمستون داعش ډلې ته له منسوب برید څخه وروسته خپل سفارت تړلی، په افغانستان کې د چینايي پانګوالو خلاف د ورته بریدونو اندیښنه ښودلې.
د دغې رسنۍ په باور، د چین له خوا د ایغور مسلمانانو د ځپلو دوام او طالبانو سره د چین د حکومت اړیکې به داعش ډله د چینایي اتباعو خلاف نورو بریدونو ته وهڅوي.
ياده رسنۍ زیاتوي، چې داعش ډله ښايي په افغانستان کې د بشپړ امنيت د تامينولو په اړه د طالبانو د ادعا ننګولو لپاره هم په دې عمل لاس پورې کړي.
د چينايي رسنۍ دا راپور په داسې حال کې دی، چې د طالبانو حاکمې ادارې څو ورځې مخکې له يوي چينايي کمپنۍ سره د آمو نفتي حوزې د استخراج تړون د لاسليک خبر ورکړ.