تاند (پنجشنبه، د جدي ۱۵ مه) د جرمني د ۲۵ جوماتونو امامانو په یوه ګډه اعلامیه کې وویل چې د طالبانو له لوري د نجونو د تعلیم مخالفت او د مخنیوی پرېکړه له اسلام سره په ټکر کې ده.
دوی د اسلام په اړه د طالبانو تفسیر او تعبیر د اسلام خلاف او د انسانانو سپکاوی بللی دی.
د جرمني د ۲۵ جوماتونو امامانو همداراز ویلي چې کوم اسلام چې طالبان یې لري هغه اسلام نه دی چې دوی او نور مسلمانان پرې باور لري.
دوی د نجونو پر پوهنتوني زده کړو بندیز د اسلام خلاف عمل بللی او د دې پرېکړې د الغا غوښتنه یې کړې ده.
د جرمني د ۲۵ جوماتونو امامانو په خپله اعلامیه کې دا هم ویلي چې نه یوازې له طالبانو څخه د نجونو پر تعلیم د بندیز د پای ته رسیدو غوښتنه کوي بلکې د جرمني له سیاستوالو او مدني ټولنې هم غواړي چې افغان نجونو او ښځو ته د تعلیم او نورو مدني ازادیو لپاره هلې ځلې وکړي.
د سعودي په ګډون ګڼو اسلامي هیوادونو له طالبانو غوښتني چې د نجونو د تعلیم مخنیوی پای ته ورسوي.
اکثره اسلامي هیوادونه اندېښنه لري چې د طالبانو افراطي پرېکړې په نړۍ کې د اسلام دین په اړه منفي تاثر رامنځته کوي او د اسلام دښمنان ورڅخه ناوړه ګټه اخلي.
له همدې کبله د چارو ځینې کتونکي وايي، طالبان یا ډیر ناپوه او بدوي خلک دي او یا اسلام دښمنان پر دوی دا ډول کارونه د یوه منظم پلان له مخې کوي.