تاند:( پنجشنبه، د جدي اتمه) د طالبانو د حاکمې ادارې د بهرنيو چارو وزير مولوي امیرخان متقي، چې څه موده مخکې ېې هم د دوی د لوړو زده کړو د وزیر شیخ ندا محمد ندیم پارونکو خبرو ته کنايوي غبرګون ښودلی و، په تازه څرګندونو کې بيا د نوموړي وروستيو خبرو پر وړاندې نيوکې کړي.
ملا متقي نن د خپلو دیپلوماتانو د لنډ مهاله زده کړو د پای ته رسېدو يوې غونډې ته د وینا پر وخت ټينګار وکړ، چې د استعدادونو له مخې به په دیپلوماتیکه دستګاه کې کسان ګماري.
نوموړي د طالبانو د لوړو زده کړو د وزیر هغې خبرې ته له څرګندې اشارې پرته چې ويلي وو « طالبانو ته د الوزولو ماينونو له مخې تحصیلي سندونه ورکوو» وويل، چې په کورونو کې به چا ته شهادت نامې او اسناد نه ورکول کيږي.
د طالبانو د بهرنيو چارو وزير دا هم وويل، چې د خپلو ديپلوماتانو په روزنيزو پروګرامونو کې یې « د اسلامي امارت د پېژندنې» مضمون هم شامل کړی، څو دیپلوماتان ېې د دوی اداره او موخې په ښه توګه وپېژني او د موخو د ترلاسه کولو لپاره ېې کار وکړي.
متقي په عین حال کې د ځینو سخت دریځو طالب مشرانو پارونکو ويناوو ته په اشارې وويل، چې يوه ناسمه جمله د يوه هېواد لپاره لوی تاوانونه لرلای شي او بايد ډډه ورڅخه وشي.
دا په داسې حال کې ده، چې په وروستيو کې د ځينو پارونکو پریکړو له امله د سخت دریځو او نورو طالب چارواکو تر منځ د اختلافاتو د شدت خبرونه ورکول کېږي.
د افغانستان د ملي امنیت پخواني رييس رحمت الله نبیل نن په یوه لیکنه کې ويلي، چې په سخت دریځو او نرم دریځو د طالبانو له وېشلو سره موافق نه دی، ځکه ټول ېې په وینا د یوې مفکورې خلک دي او افغانانو او نړيوالو سره ېې تعامل نه شي کیدای.
موږ، د افغانستان خلک، د نړۍ او اسلامي هېوادونو غږ کوو چې په افغانستان کې د سولې، امنیت، بشري حقونو او د ښځو د حقونو د ټینګښت لپاره کار وکړي. د ملګرو ملتونو نیلي هیلمټ سوله ساتي ځواکونه باید افغانستان ته راشي ترڅو افغانان له اوسني بشري ناورین څخه وژغوري. د ملکي وګړو، ښځو، نجونو ساتنه،