تاند:( جمعه، د جدي نهمه) د سختو واورو له امله نن د سالنګونو او غور ولايتونو لارې تړل شوي.
په سالنګونو کې ځايي چارواکو تر راتلونکو ۲۴ ساعتونو د واورو د ورښت وړاندوينه کړې ده.
د غور ولايت ځايي چارواکو ويلي، چې کابل او هرات ولايتونو سره د دغه ولايت لارې هم د سختو واورو او توپانونو له امله تړل شوي دي.
تر اوسه د دغو ورښتونو او توپانونو له امله د مالي او ځاني زيانونو راپور نه دی ورکړل شوی.
د افغانستان د هوا پېژندنې ادارې څو ورځې مخکې په ۱۳ ولايتونو کې د سختو ورښتونو وړاندوينه کړې وه.
دا په داسې حال کې ده، چې سږ ژمی بيا افغانان له سخت بشري او اقتصادي ناورين سره تیروي.
د افغانستان يوه لويه برخه خلک د طالبانو له واکمنيدو سره، د نړيوالو په بشري مرستو خپل ژوند تامینوي، چې د طبیعي پېښو او لار بنديو له امله په مرسته رسیدو کې ورته د ځنډ انديښنې موجودې دي.