تاند:( دوشنبه، د قوس اته ويشتمه) په اسلام اباد کې د افغانستان د سفارت لپاره د افغانستان د حاکمې طالب ادارې شارژدافیر سردار احمد شکېب پاکستان سره د طالبانو د وروستیو ناندريو د حل لپاره د یوې ګډې کمېټې د جوړولو خبر ورکړی.
د هغه په وينا، په پام کې ده چې ټولې وروستۍ ستونزې د همدې کمېټې له لارې تعقیب او حل شي.
نوموړي د پاکستان په زندانونو کې د شاوخوا دوه نیم زره افغان کډوالو د موجودیت خبر هم ورکړ او ويې ويل د خوشې کولو لپاره ېې هڅې روانې دي.
پاکستان په دې اړه څه نه دي ويلي.
په وروستيو ورځو کې د طالبانو او پاکستاني ځواکونو تر منځ په سپین بولدک -چمن کې د وسله والو نښتو خبرونه زیات شوي.
د یادونې وړ ده، چې دواړه لوري یو بل د دغو مرګونو نښتو اصلي عامل بولي.