تاند:(سې شنبه، د قوس دوه ويشتمه) د اسلامي دولت یا داعش سختدریځې ډلې خراسان څانګې د کابل په شهرنو سیمه کې پر هغه مېلمستون د برید مسوولیت منلی چې عموماً یې ډیر میلمانه چينايي اتباع وي.
د فرانس پریس خبري اژانس د راپور له مخې، د داعش ډلې په اعلامیه کې راغلي:«د دوی دوو وسله والو د هوټل په دروازه کې د هغه ساتونکو ته لاسي بم وغورځاوه او دوه بمونه یې د چینایانو د مېلمستون په سالون کې په داسې حال کې وچاودول چې د مېلمستون چینايي مېلمنانه په یوه محفل کې راغونډ شوي وو.»
سرچینه د داعش د بیان له مخې، زیاتوي، یوه داعشي وسله وال د طالبانو خوا ته بم واچاوه او بل یې د هوټل د خونو د دروازو د پرانیستلو په خاطر چاودېدونکي مواد والوزول او د میلمستون په خونو کې یې پر مېلمنو ډزې وکړې.
په کابل کې د طالبانو د حاکمې ادارې وياند ذبيح الله مجاهد پرون وویل چې په دې برید کې درو تنو لاس درلود چې ټول د دوی ځواکونو ووژل.
د طالبانو د وياند د پرونیو خپرو کړو معلوماتو په اساس، په دې پېښه کې دوه بهرنیان هغه مهال ټپیان شوي وو، چې له پاسنیو پوړونو يې ځانونه وغورځول.
په کابل کې د ایمرجنسي روغتون مسوولان وايي چې دغه روغتون ته ۳ مړي او ۱۸ ټپیان وروړل شوي دي.
د روغتون سرچينو د وژل شويو او ټپیانو د هويت په اړه څه نه دي ويلي.
پرونی برید یوه ورځ وروسته د چینایي اتباعو د هدف ګرځولو لپاره وشو، چې په کابل کې د چين سفير د طالبانو د بهرنيو چارو وزارت له سیاسي مرستیال عباس ستانکزي څخه د دوی د سفارت د ښه امنيت نيولو غوښتنه وکړه.
طالبانو د یاد برید په اړه له لومړنيو جزییاتو وراخوا څه نه دي ويلي.
د افغانستان د کورنیو چارو پخواني وزير علي احمد جلالي د دغه برید په غبرګون کې وويل، چې دې پېښې او په کابل کې د روسیې او پاکستان پر سفارتونو بریدونو وښوده، چې په افغانستان کې د امنيت تامينولو او نورو تروريستي ډلو د مهارولو په اړه د طالبانو ژمنې عملي نه وې.
د داعش له لوري د دې برید د مسوولیت تر منلو مخکې د افغانستان د چارو څارونکی ژورناليست سمیع یوسفزی د دغه برید تر شا د داعش ډلې د لاس لرلو شک څرګند کړ او ویې ویل چې ياده ډله د افغانستان د امنيت ټينګولو په اړه د طالبانو د ادعاوو په ننګولو توانيدلې ده.
خو له دې ډول بریدونو سره سره په تېرو ۱۶ میاشتو کې کومه ډله نه ده توانېدلې چې د طالبانو په مقابل کې غښتلې جبهه جوړه کړي یا د افغانستان کومه سیمه ونیسي.
د احمدمسعود په مشرۍ د ملي مقاومت جبهې په پنجشیر او د بغلان په اندراب کې د جبهې د جوړولو هڅې وکړې خو طالبان وتوانېدل چې د هغوی مقاومت مات او ځواکونه یې تر ډېره وځپي.
دا غش د بریتانیا تر رهبرئ لاندی د ای اس ای وحشیان دي.