تاند:(شنبه، د قوس دولسمه) د ملګرو ملتونو د کډوالو عالي کميشنرۍ په افغانستان کې د داخلي بې ځايه شويو د وضعیت په اړه اندیښنه څرګنده کړې او ویلي، چې بې ځايه کيدو د ښځو پر وړاندې د تاوتريخوالي او جبر کچه لوړه کړي ده.
یاد شوی بنسټ ټینګار کوي، چې نور د دغو بشري حقونو د نقض موده باید پای ته ورسیږي.
ملګرو ملتونو جګړه، نا امني، له مجازاتو بښل کېدل، د خوړو نه خونديتوب او حتا کرونا ویروس پر ښځو د تاوتريخوالي زیاتیدو اصلي لاملونه ګڼلي دي او په افغانستان کې ېې ورسره پر زیاتې مبارزې ټينګ کړی.
دا اندیښنې په داسې حال کې دي، چې نورو مختلفو نړيوالو سازمانونو د بشري او اقتصادي ناورين له امله د افغانستان دننه او بهر د کډوالۍ د کچې د لوړيدو خبر ورکړی.
ځينو رسنيو له یو شمېر سیمو څخه د داخلي بې ځايه شويو د کم عمرو نجونو د جبري ودونو راپورونه ورکړي او ويلي، چې لوړ عمره خلکو ته د پیسو په بدل کې ورکول کېږي.
د طالبانو د کډوالو چارو وزارت مرستيال مولوي عبدالرحمن راشد بيا بلخ ته د یوه وروستي سفر پر مهال ويلي، چې د دوی له بيا واکمنيدو سره شاوخوا يو ميليون داخلي بې ځايه شوي کسان خپلو اصلي سيمو ته ستانه شوي دي.