تاند:(پنجشنبه، د قوس لسمه) ‏‏‏د نجونو د زده کړو لپاره د مبارزې مشهور پښتون مبارز ضياء الدين يوسفزی، چې د همدې مبارزې په لاره کې یې يوازينۍ لور( ملاله يوسفزۍ) د سولې د نوبل جایزه ګټلې ده، په افغانستان کې د طالبانو د حاکمې ادارې امیرالمؤمنین ملا هبت الله اخندزاده او د طالبانو نور مشران د نجونو د زده کړو د ممانعت له کبله وننګول.

نوموړي په یوه ځانګړې ټلویزیوني مرکه کې ملا هبت الله اخندزاده او نور طالب مشران مخاطب او ورته وويل:« د نجونو د زده کړو د مخنيوي لپاره د قرآنکريم يو آيت یا بل دیني حکم را وښيئ، که مو وښود، زه د یوه مسلمان او پښتون په توګه په دې اړه له خپلې مبارزې لاس اخلم.»

ښاغلي يوسفزي په دې مرکه کې وویل، چې د نړۍ په ۵۶ مسلمانو هېوادونو او ۱،۹ ميليارده خلکو کې طالبان يوازيني خلک دي، چې له کوم شرعي او بل دلیل پرته یې د نجونو د زده کړو مخالفت پيل کړی او ځانته د ټولو مسلمانانو د نجونو په اړه د پریکړې بې بنسټه حق ورکوي.

یوسفزي زياته کړه، چې د افغانستان د خپلواکۍ اتل غازي امان الله خان سل کاله مخکې نه يوازې دا چې په کور دننه نجونو ته د زده کړو اسانتياوې برابرې کړې، بلکې هېواد ته بهر ېې د زده کړو لپاره واستولې.

هغه په هماغه وخت کې د باچا خان د هغو هڅو يادونه هم وکړه، چې پښتونخوا کې یې د نجونو د زده کړو لپاره یې کولې.

هغه د نجونو له زده کړو سره د طالبانو مخالفت ته د پښتنو د کولتوري حساسيت نوم ورکول بې ځايه ادعا وګڼله او ويې ويل، که داسې وای د افغانستان په ۲۰ کلن جمهوري نظام کې به نجونو ته تر ۱۲ زرو ښوونځي نه جوړيدل او تر ۴ میلیونو نجونو به زده کړې نه پکې کولې.

ضیاءالدین ټینګار وکړ، چې د طالبانو تحریک ټول شاوخوا ۹۰ زره تنه غړي لري او نه شي کولای د نړۍ د شاوخوا پنځوس میلیونه پښتنو استازيتوب وکړي.

نوموړي په دې اړه، چې که طالبان د پښتنو او اسلام استازيتوب نه کوي نو له کومه ځايه سرچينه اخلي، وويل:« په افغانستان کې پر افراطیت له څلور لسیزو راهیسې امريکا، سعودي او پاکستان د جهاد په نوم د خپلو ګټو لپاره پر افراطي ډلو پانګونه وکړه، تر دې چې نبراسکا پوهنتون افغان مهاجرو ته د رياضي افراطیت هڅونکی نصاب هم رامنځته او پکې د جمع او تفريق لپاره د شوروي عسکرو وژل مثالونه وګرځول.»

د ملاله یوسفزۍ پلار، چې په ۲۰۰۷ کې ېې د پښتنونخوا په سوات دره کې د پاکستاني طالبانو له لوري د نجونو د ښوونځيو د سوزولو او تړلو پر ضد مبارزه پیل کړی وه، پر افغان نارينه او خاصتاً پلرونو نیوکه وکړه، چې د لوڼو د ښوونځيو د پرانيستلو لپاره یې لازمه مبارزه نه کوي.

‌د هغه په وينا، پلرولي يوازې لوڼو ته ډوډۍ ورکول نه دي، بلکې سالمه روزنه او پوهول هم یو مهم مسووليت دی.

د ضیاءالدین يوسفزي په باور، د طالبانو ادارې ته به د نجونو د ښوونځيو له بیرته پرانیستلو پرته دوام او بریالیتوب ممکن نه وي او دوی د ځان لپاره هم باید دغه ښوونځي بیرته پرانیزي.

د طالبانو پر ادارې له شپږم ټولګي څخه پورته د نجونو د ښوونځيو د تړلو په اړه په ملي او نړيواله کچه په پرله پسې توګه نیوکې کیږي، خو دوی په دې اړه خپله پریکړه نه ده بدله کړې او د خلکو پوښتنو ته ېې هم ځوابونه نه دي ورکړي.