تاند:(سې شنبه، د قوس اتمه) د نورستان لپاره د طالبانو چارواکي وايي، چې په دې ولایت کې د ځنګلونو د ساتنې په موخه د شنې قطعې پر جوړولو کار پیل شو.
په دې موخه د طبیعي سرچینو په تېره د ځنګلونو د ساتنې لپاره د ځانګړې شنې قطعې د جوړولو لپاره د ۶ ولایتونو د زرغونو قطعاتو عمومي طالب مسؤل مولوي عبدالحلیم د نورستان لپاره د طالبانو والي حافظ محمد اغا حکیم سره لیدلي.
نوموړي ويلي:«د ځنګلونو د ساتنې لپاره درې دلګي چې سربازان به يې د غرنیو سیمو او ځنګلونو سره کامله اشنا يي لري، په دنده ګمارل کېږي ، همدارنګه یادې قطعې به په ټولو اړینو وسایلو سمبال وي، ، چې د امنیه قوماندانۍ په چوکاټ کې د کرهڼې او مالدارۍ ریاست سره په مشوره فعالیت کوي .»
د طالبانو والي ويلي، هیچا ته به اجازه ورنه کړي، چې شنې ونې قطع او يايې قاچاق کړي.
دا په داسې حال کې ده، چې مخکې خپله د طالبانو يو شمېر قومندانان د ځنګلونو په وهلو او قاچاق کې په لاس لرلو تورن شوي وو، خو دوی دا ادعاوې بې بنسټه ګڼلې وې.