تاند:(سې شنبه، د قوس اتمه) په جرمني کې مېشتو پښتنو فرهنګیانو د خوشال انځور په هڅو د تازه جلا وطنه شاعر ډاکټر منقاد الرحمن رودوال په درناوي د مشاعرې شپه جوړه کړې وه.
په دې مشاعره کې د جرمني مېشتو يو شمېر پښتنو فرهنګیانو تر څنګ يو شمېر تازه جلا وطنه شویو فرهنګي څېرو لکه: ډاکټر احسان الله درمل، نور ولي سعید شینواري، طایر ځلاند، ولي محمد کنډیوال او یو شمېر نورو خبرې او شعرونه واورول.
ډاکټر رودوال له فرهنګیانو مننه وکړه، چې په جلا وطنۍ کې يې د هغه فرهنګي هڅې ستایلي دي.
د طالبانو له بيا واکمنيدو سره يوه د پام وړ برخه افغان فرهنګيان جرمني ته لاړل، چې ورتلو سره یې په دغه هېواد فرهنګي هڅې هم غوړیدلي دي.