تاند:(سې شنبه، د قوس اتمه) د طالبانو د سوداګرۍ او صنايعو وزير عزیز الدین نوري په چین کې د یوه نندارتون پر مهال ټینګار وکړ، چې د وریښمو لارې اقتصادي اسانتياوو نه په استفادې سره دې د افغانستان – چین اقتصادي اړیکې غښتلې شي.
نوموړي دغه لاره د ترانزيت یوه ښه او ډاډمنه لاره وګڼله او ويې ويل، چې طالبان د واخان په لاره هم چین سره د اقتصادي اړيکو د پراختيا په هڅه کې دي.
طالب وزیر په دې برخه کې چینایي چارواکي د زيربناوو جوړولو ته هم وهڅول.
په دې اړه د چینایي چارواکو د ځواب په اړه څه نه دي ويل شوي.
ځینې شنونکي په دې برخه کې پاکستان تورنوي، چې افغانستان له چین سره مستقیم وصل کيدو ته ډېر نه پریږدي او غواړي دا اړیکې د دغه هېواد په انحصار کې وي او ډېره ګټه ېې دوی ته ورسیږي.