تاند(شنبه، د قوس ۵ مه) د طالبانو د حکومت د بریتانیا د ټیلګراف ورځپاڼې هغه راپور رد کړ چې ګنې طالبانو له قطر سره د فوټبال د نړیوال جام د سیالیو لپاره د لوبغالو په جوړولو کې پیسې ګټلي دي.
تیلګراف ورځپاڼې د جمعې په ورځ په یوه راپور کې ویلي چې طالبانو په قطر کې د لوبغالو د جوړولو لپاره د وسایلو د برابرولو له درکه میلیونونه ډالر ګټلي دي.
ټیلګراف ورځپاڼه اداعا کوي چې د طالبانو د دوحې د دفتر یوې سرچینې ورته ویلي چې د دوی مشرانو په تېرو لسو کلونو کې پر هغو پرېمانه پیسو، چې د سولې د خبرو لپاره د معاش په توګه یې ترلاسه کولې، درانه تعیمیراتي ماشین الات د فوټبال د لوبغالو د جوړولو لپاره اخیستي دي.
د طالبانو یو شمېر مشران له ۲۰۱۳ څخه د قطر په پلازمېنه دوحه کې اوسېدل چې له امریکا او ملګروملتو سره د سولې خبرې وکړي.
سرچینې ادعا کړې چې طالبانو د فوټبال د نړیوال جام لپاره پر تعمیراتي چارو ډیره پانګونه کړې او دا ټورنمنټ د هغوی لپاره یو طلايي فرصت و.
خو د طالبانو ویندوی ذبیح الله مجاهد د دې راپور په اړه پر خپله ټویټرپاڼه لیکلي: د ډیلي ټېلېګراف ورځپاڼې ادعا له حقیقت څخه لرې ده چې وايي د ا.ا ځينو غړو په قطر کې د لوبغالي د جوړیدو له امله ډيرې پیسې ګټلي دي. دا ډول پروپاګند د غربي رسنیو هغه استخباراتي ماموریت او هڅه ده چې غواړي په یو ډول د اسلامي امارت په ضد اذهان خراب کړي…. »
د ډي ټېلېګراف ورځپاڼې هغه ادعا له حقیقت څخه لرې ده چې وايي د ا.ا ځينو غړو په قطر کې د لوبغالي د جوړیدو له امله ډيرې پیسې ګټلي دي.
دا ډول پروپاګند کول دغربي رسنیو هغه استخباراتي ماموریت اوهڅه ده چې غواړي په یوډول د اسلامي امارت په ضد اذهان خراب کړي.
هلته هيڅ دا ډول معامله نده شوې. pic.twitter.com/mHAqhVeE6l— Zabihullah (..ذبـــــیح الله م ) (@Zabehulah_M33) November 26, 2022
ټیلګراف لیکلي چې ځینو طالبانو له شپږ تر لسو ثقیل ماشین الات لرل او د هر ماشین له درکه د میاشتې تر ۱۰ زره پونډو پورې پیسې ګټلې.
ورځپاڼه همداراز وايي چې قطري چارواکو د امریکا او ملګروملتو په تایید په دوحه کې د طالبانو د سیاسي دفتر غړیو ته هره میاشت زرګونه پونډه په دې خاطر ورکول چې له لوېدیځ سره د سولې په خبرو کې اسانتیا رامنځته شي.
د راپور له مخې، د طالبانو هغو غړیو ته چې قطر ته به یې سفر کاوه لوکس موټرونه، وړیا روغتیايي خدمات او درې وخته خواړه ورکول کېدل.
ټیلګراف د ترلاسه کړیو معلوماتو له مخې لیکي چې طالبانو ته به په لومړیو کې پیسې نغدې ورکول کېدې خو وروسته به په مستقیم ډول د طالب مشرانو بانکي حسابونو ته لېږل کېدې او له همدې کبله د قطري او امریکايي چارواکو لپاره اسانه نه وه چې پوی شي طالبان پیسې په څه لګوي. خو قطري چارواکي ادعا کوي چې دوی د امریکایانو په همږغۍ طالبان څارل چې پیسې په څه مصرفوي.