تاند:(یکشنبه، د قوس شپږمه) د پخواني ولسمشر حامد کرزي دفتر پر نوموړي د طالبانو له لوري له هېواده د باندې د سفرونو د بندیز ختمیدو خبر تایید کړی.
حامد کرزي ته د نیږدې ټلویزیون کابل نیوز په یوه راپور کې د هغه د دفتر په حواله راغلي، چې کرزي ته په دې اړه ورپېښ قيودات پای ته رسیدلي، خو تر اوسه کوم بهرني هېواد ته د هغه د سفر اجنډا نه ده موجوده.
مخکې په ځینو راپورونو کې ویل شوي وو، چې کرزی به د دغه بندیزونو له پای ته رسېدو سره لومړی جرمني ته په یوه سفر لاړ شي.
د طالبانو سرچينو په دې اړه څه نه دي ويلي.
طالبانو مخکې پر نوموړي د بهرنيو سفرونو د بندیز ادعاوې رد کړې وې، خو د طالبانو له واکمنيدو وروسته کرزی له کابله بهر حتا نورو ولايتونو ته سفر نه دی کړی.
د طالبانو له بيا واکمنيدو سره، دوی په کابل کې د یو شمېر نورو مطرحو سياسي څېرو د بهرنيو سفرونو په ممانعت هم تورن شوي، خو د مصالحې عالي شورا پخواني رييس ډاکټر عبدالله عبدالله او د پخواني مشرانو جرګې رييس فضل هادي مسلميار په دې ترڅ کې څو ځله بهرنيو هېوادونو ته په شخصي سفرونو لاړل او بیرته کابل ته ستانه شول.