تاند:(چار شنبه، د قوس دويمه) د روسیې یوه استخباراتي مقام «سرگئی ناریشکین» له تاجيکستان سره د افغانستان په اړه د فعالې استخباراتي همکارۍ خبر ورکړی.
نوموړي په یوه تازه مرکه کې تاجيکستان د ترهګرۍ پر وړاندې د خپل هېواد د باور وړ ملګری بللی.
د هغه په وينا، د افغانستان وضعیت دې سره تړاو لري، چې د طالبانو تحریک په څومره چټکۍ د افغانستان مختلف قشرونه سره همغږي کوي او ګډو موخو ته ېې رسوي.
روسي چارواکو دا څرګندونې په داسې حال کې کړي، چې تازه د طالبانو پر ضد د يوې جنګيدونکې ډلې مشر احمد مسعود د روسیې په غوښتنه مسکو ته تللی.
ويل کيږي، چې روسیه او د سیمې نور هیوادونه پر طالبانو او احمد مسعود ډلې د پخلاينې لپاره فشارونه کړي.
احمد مسعود، چې روسیې سره ښې اړيکې له پلار احمد شاه مسعود څخه په ميراث ورپاتې دي، د روسیې تر اغېز لاندې هېواد تاجيکستان کې اوسيږي.
راپورونه ښيي، چې د پاکستان استخبارات، قطر او یو شمېر نور هېوادونه هم د پردې تر شا د طالبانو او احمد مسعود ډلې تر منځ د سولې خبرو په هڅو کې ښکېل دي او دوی په دې اړه پر طالبانو ډېر فشارونه اچولي.