تاند:( پنجشنبه، د عقرب شپږ ويشتمه) د طالبانو تر کنټرول لاندې د افغانستان بانک چارواکو ويلي، چې د طالبانو د رييس الوزرا اقتصادي مرستيال ملا عبدالغني برادر نن دغه بانک ته ورغلی او د مالي ټيکاو په نوم د یوې کمېټې د غونډې مشري ېې پکې کړې ده.
د بانک د اعلاميې له مخې، په دې غونډه کې د افغانستان بانک لپاره د طالبانو د چارواکو تر څنګ د یو شمېر سوداګريزو بانکونو مشرانو په انلاين ډول جوړه شوې غونډه کې ګډون کړی.
د افغانستان بانک طالب چارواکو د دغې غونډې په اړه نور جزییات نه دي ورکړي.
افغانستان بانک، چې د افغانستان د قوانينو له مخې مستقل دی، پخوا د حکومت د نورو برخو چارواکي معمولا نه ورتلل.
بانک ته د ملا برادر د ورتلو خبر په داسې حال کې ورکړل شوی، چې د افغانستان د ملي امنیت پخواني رييس رحمت الله نبیل نن د ملا برادر د مسومیت او د درملنې لپاره دوبۍ ته د استول کیدو ادعا کړې وه.
نبیل تر دې وړاندې هم څو داسې ادعاوې کړې وې چې وروسته ناسمې ثابتې شوې.