تاند:(يکشنبه ،د عقرب دوه ویشتمه) د طالبانو د حاکمې ادارې ویاند ذبیح الله مجاهد په کابل کې د داعش ډلې پر ضد د طالبانو د تېرې شپې عملياتو جزییات خپاره کړل.
نوموړی وايي، چې تېره شپه د کابل ښار د پنځلسمې حوزې اړوند پنج صد فامیليو په سیمه کې د داعش ډلې پر یوه پټنځای د طالبانو د ځانګړو ځواکونو لخوا عمليات تر سره شول چې په پایله کې یې ۵ تنه داعشيان ووژل شول.
مجاهد زیاتوي، چېدغه کسان د یوې مهمې شبکې غړي او په کابل ښار کې یې په کوچنیو چاودنو کې لاس درلود.
د هغه په وينا، نیول شویو کسانو غوښتل ځینې لویې تخریبي کړنې ترسره کړي، چې مخکې له مخکې کشف او له منځه یوړل شول.
د طالبانو د وياند د معلوماتو له مخې ، له یاد پټنځای څخه یو شمېر وسلې، لاسي بمونه، ریمودونه، او چاودېدونکي توکي تر لاسه شوي دي.
مجاهد دغه معلومات په داسې مهال خپاره کړي، چې نن يو شمېر خبريالانو د طالبانو پر ادارې د معلوماتو د ځنډ خپریدو له امله نیوکې کړې وې.