تاند:(يکشنبه ،د عقرب دوه ویشتمه) د ملګرو ملتونو د کډوالو لویې کميشنرۍ د افغانستان د داخلي بې ځايه شويو د بد وضعیت په اړه خبرداری ورکړی.
دغه سازمان په یوه اعلامیه کې د ژمي له رارسيدو سره د افغان بې ځايه شويو وضعيت د ډېرې اندیښنې وړ ګڼلی او د عاجلو مرستو غوښتنه يې ورسره کړې ده.
د يادې کمشنرۍ ویاند اولگا سارادو وويل:« سلګونه زره دغه افغان کډوال د سرپناه، د سرپناه د ګرمولو، د خپلو ګرمو لباسونو، خوړو او نورو عاجلو اړتياوو د برابرولو لپاره سختو ستونزو سره مخامخ دي.»
يادې کميشنرۍ په ژمي کې د سانتي ګراد منفي پينځه ويشت درجو پورې د افغانستان د ژمي د سړيدو وړاندوینه کړې او ويلي، چې سوړ ژمی به د افغان کډوالو وضعیت نور هم پېچلی کړي.
د ملګرو ملتونو د مختلفو ادارو د ارقامو له مخې د افغانستان شاوخوا ۲۴ ميليونه وګړي فقر، بشري او اقتصادي ناورين ځپلي او عاجلو مرستو ته اړتيا لري.
په افغانستان کې د داخلي بې ځايه شويو شمېر شاوخوا درې نیم میلیونه وګړو ته رسيږي.
نا امني، بې کاري او وچکالي په افغانستان کې د داخلي کډوالۍ له اصلي لاملونو ګڼل کېږي.
د طالبانو له بيا واکمنيدو او نسبي امنيت له تامين سره شاوخوا يو ميليون نور داخلي بې ځايه شوي خپلو اصلي سيمو ته ستانه شوي، خو ورسره د مرستو په نه تر سره کيدو نيوکې کوي.