تاند:(شنبه ،د عقرب یو ویشتمه) د افغانستان د اورپټلۍ ادارې لپاره د طالبانو چارواکي وايي، چې تر راتلونکو دوو اونیو د هرات- خواف د اورپټلۍ د ترميم چارې بشپړيږي.
د یادې ادارې وياند عبدالسميع دراني ویلي، چې په نیږدې راتلونکي کې به یې د ادارې يو پلاوی د همدې پروژې په اړه ایران ته سفر وکړي.
سرچينه زياتوي، چې پلاوی به ايراني لوري سره پر دوه اړخیزو همکاریو هم خبرې وکړي.
چارواکي هیله لري، چې د یادې پروژې له بشپړیدو سره به ايران ته د افغان صادراتو سطحه او اسانتياوې زياتې شي.
د هرات- خواف اورپټلۍ چارې د پرزول شوي جمهوري نظام پر مهال بشپړې شوې او پرانيستل شوې وې، خو وروسته يې د وسایلو د لوټ تالان خبر ورکړل شوی و.