تاند:(چار شنبه ،د عقرب اتلسمه) د زابل ولايت د بسکې پل، چې د ترکېې د ۷۷ په نوم ساختماني شرکت له لوري تازه رغول شوی، د يوې برخې د ويجاړیدو خبر یې ورکړل شوی.
د دغه پل د خرابې شوې برخې ځینې عکسونه په ټولنیزو رسنیو کې خپاره شوي او د طالبانو منتقدینو د دوی په واکمنۍ کې هم د فساد د موجودیت ادعاوې کړي.
د طالبانو د فوايد عامې وزارت ویاند حمیدالله مصباح په خپله ټویټر پاڼه کې په دې اړه داسې غبرګون ښودلی:«د بسکې پل
د ۷۷ترکي ساختماني شرکت لخوا افغانانو ته د ډالۍ په توگه جوړ شوی ، لاندینۍ برخه ديوال يې يوه افغاني شرکت ته په قرارداد ورکړی، چې متاسفانه هغه شرکت غير معياري کار کړی وو.»
نوموړي ویلي، دا چې د ياد پل پايې هم ترکي شرکت پخپله جوړ کړي، له دې کبله پل ته هيڅ تاوان نه رسېدلی او يوازې لاندینۍ ژۍ يې تخريب شوی.
د طالب ویاند په وینا ،ياده موضوع جدي تعقیب شوې او ۷۷ ترکي ساختماني شرکت بيرته نړیدلې ساحه پخپله په معياري ډول جوړوي.
هغه ډاډ ورکړی، چې د قرارداد له نقضونکي شرکت سره به جدي چلند وشي.