تاند- د افغانستان کرکټ بورډ وايي، په نړیوالو معیارونو برابر نوی جېم او د شاوخوا ۵۰ لوبغاړو لپاره هستوګنځي جوړوي.
د کرکټ بورډ نن (دوشنبه) رسنیو ته په یوه استولې خبرپاڼه کې لیکلي، د افغانستان کرکټ بورډ اجراییه رییس ښاغلی نصیب خان وایي چې دلته به الف، ایمرجنګ، د افغانستان د ۱۹ ګلنو څخه کم عمره او ملي لوبغاړي د تکړه او ښو روزنکو تر څارنې لاندې تمرینات پیل کړي. ده همداراز ویلي چې دغه بورډ غواړي چې د کرکټ سرپټې اکاډیمي ترمیم کړي. د ده په وینا له سرپټې اکاډیمۍ او له نوي جوړېدونکي جیم څخه به د لوبغاړو د تمرین او روزونې لپاره کار واخیستل شي.
د افغانستان د کرکټ ملي لوبډله، چې تازه یې په نړیوال شل اوره جام کې سیالۍ پای ته رسیدلي، د دې لپاره چې د نړۍ په لسو غوره لوبډلو کې شامله ده، د ۲۰۲۴ نړیوال جام ته یې په مستقیم ډول لاره موندلې ده.