تاند:(شنبه ،د عقرب څوارلسمه)د طالبانو د ریاستالوزراء اقتصادي مرستیال الحاج ملا عبدالغني برادر اخوند پرون نیمروز ولایت ته سفر کړی.
د نوموړي دفتر په یوه اعلامیه کې ویلي:« ملا برادر اخوند د یاد ولایت مسوولینو په ملتیا د کمال خان بند اړوند چارې له نېږدې وکتلې او مسوولينو ته يې د چارو د لاښه والي په موخه لازمې سپارښتنې وکړې.»
سرچينه زياتوي:« برادر اخوند کمال خان بند ملي او حياتي پروژه وبلله او د رامنځته شويو نوښتونو له امله یې د مسوولينو د هڅو قدرداني وکړه.»
د طالبانو په اعلامیه کې په دې اړه، چې برادر د کمال خان بند د کومو« چارو» په اړه سپارښتنې کړي او د کومو « رامنځته شویو نوښتونو» قدرداني ېې کړې، څه نه دي ويل شوي.
دا کمال خان بند ته د ملا برادر څووم سفر ګڼل کېږي.
مخکې ايران د طالبانو له خوا د ياد شوي بند د اوبو د خوشې کیدو خبرونه ورکړي وو، چې د خلکو توند غبرګون ېې پارولی و.
کمال خان بند د افغانستان د بې واکه شوي ولسمشر محمد اشرف غني د حکومت له تر ټولو لویو پروژو څخه و، چې د ایران د سخت مخالفت او د لسګونه افغان ساتونکو له وژل کيدو سره يې چارې بشپړې شوې.